[Kojak]

فيلم الأسبوع



الرجل الثانى


تمثيل

رشدى اباظه

صباح

صلاح ذو الفقار

ساميه جمال

صلاح نظمى

بدر الدين نوفل

حسن حامد


اخراج
عز الدين ذو الفقار

انتاج
عز الدين ذو الفقار
سيناريو
عز الدين ذو الفقار
تصوير
وحيد فريد
حوار
يوسف جوهر
الانتاج 1959
مونتاج
البير نجيب
مناظر
شادى عبد السلام



القصه

ذروة نضج السينما المصرية فى محاكاتها للسينما الأمريكية حيث يتناول الفيلم عالم الجريمة الغامض فى مزيج خاص يعطى البطولة للمجرم و براعتة و شخصيتة الكاريزمية وفى الوقت نفسه يجعلك تتعاطف مع محقق الشرطة و مساعيية الجادة للنيل من الأشرار...تدور الاحداث حول "عصمت" (رشدى اباظه) الذى يدير عمليات تهريب متخذا من النادى الليلى الذى يملكه ستارا لاعماله غير المشروعه التى تشاركه فيها عشيقته و ام ابنته الوحيده الراقصه المثيره "سمرا" (ساميه جمال) فى احد اقوى ادوارها

...يندس الضابط القادم من سوريا(صلاح ذو الفقار) بين العصابه منتحلا شخصيه شقيق المغنيه "لمياء" (صباح) التى يحبها "عصمت" من طرف واحد...و ذلك باعتباره هاربا من الشرطه لارتكابه جريمه قتل وجاء ليطلب الحمايه لدى زعيم العصابه

... فى حين يتضح أن البطل ما هو إلا الرجل الثانى فى سلسلة الأحداث بينما الرجل الأول قابع فى الظلام يدير عملياتة الإجرامية فى الخفاء...و هناك بالطبع اهم محركات الفيلم بدايه بقصه الحب التى تنشأ بين "المغنيه" الشابه التى جاءت لتنتقم لمقتل اخيها و بين ضابط الشرطه الجاد...ثم حب البطل للمغنيه من طرف واحد

الذى يقابله حب الراقصه له ايضا من طرف واحد و اخيرا "الغيره" القاتله التى وحدها يمكن ان تقلب موازين الاحداث و حتى تتابعات النهايه الفائقه الكثافه والمطاردات ثم المفاجأت

و تبدل الكفه بين طرفى الصراع حتى انك لا يمكنك التنبؤ بالنهايه سوى مع قدوم النهايه!!

[S A L M A]

ازيكم يا جماعه انا بخير و ما تقلقوش اوي كده

انا اعتذر عن غيابي المفاجئ
وذلك لان اصاب كومبيتر بتاعي فايرس

من ليلة ما نزلت فيلم اضواء الدينه....

مش هاقدر اكون اون لاين معاكم كتير لحد مااصلح الجهاز كله

انا في الكليه و بكتب عربي بطريقه صعبه اوي لكن ان شاءاله هشارك زي الاول واكتر

ميرسي يا موجي على المعلومات الجميله دي عن فيلم اضواء الدينه

وانا حظي وحش اوي لاني غبت عن فيلم الدلوعه شاديه

و شكرا كوجاك على قلقك على انا ماكنتش اعرف اني غاليه عليكم بالشكل الجميل دا

شكرا يا اصدقائي bye

[SPIDERR]

الف حمدلله على سلامتك انتى والجهاز يا سلمى والحمدلله انك بخير

قبل ما اشارك فى الحديث عن فيلم الرجل الثانى احب اتاسف انى بقالى كتير مشاركتش معاكو رغم الافلام الهايله اللى اتكلمتو عنها وده لانى كنت مشغول الفتره اللى فاتت بمنتدى الرياضه العالميه

عموما البطوله الافريقيه خلصت وانا انشاء الله هاكون معاكو دايما

وبالنسبه لفيلم الرجل الثانى فانا فى الاول احب اشكر كوجاك انه اختار الفيلم ده يكون فيلم الاسبوع لانه فعلا فيلم من اقوى الافلام اللى قدمتها السينما المصريه والعربيه وفى رايى انه اقوى واصدق فيلم يتناول عالم الجريمه والغموض فى السينما المصريه وصعب انه يتكرر عمل زيه ونصدقه زى ما صدقنا فيلم الرجل الثانى

ولو اتكلمنا عن اداء الفنان العظيم رشدى اباظه فهو فى الفيلم ده اكد للجميع انه من افضل الفنانين اللى ظهرو على شاشه السينما المصريه وده لان اداءه كان مقنع جدا وقدم دور عصمت المدير والمشرف الفعلى والمخطط لكل عمليات التهريب اللى بتقوم بيها العصابه لحساب الرجل الاول اللى مظهرش غير فى نهايه الفيلم لكننا كنا حاسين بوجوده وباهميته فى القصه كلها

والحقيقه اجمل مشهد عجبنى فى الفيلم من اول ما حاول عصمت انه يستغل سفر اكرم ويقيم علاقه مع لميا وبعدها اتفاجا بوجود اكرم ادامه فيقوم عصمت بتهديد اكرم انه هيقتله لو ما قالش ايه اللى جابه دلوقتى رغم انه المفروض يكون سافر وفجاه تظهر سمرا فى مشهد قوى جدا وتبرر لعصمت وجودهم هنا لان اكرم بيحبها وهى بتحبه وهيتجوزو وانه مرضيش يسيبها لما عرف ان بنتها فى المستشفى بتعمل عمليه ووصلها فيفضل عصمت يضحك جامد جدا باداء مقنع جدا جدا لغايه ما تصدمه سمرا بان بنته ماتت فى المستشفى فتتغير ملامحه تماما ويبان الحزن عليه بشكل مقنع جدا برده لكن عقله الاجرامى بيرجع بسرعه يفكر فى التهريب ويبدا يخطط من اول وجديد

معلش لو طولت عليكو بس حقيقى الفيلم ده انا بحبه جداااااا

[Kojak]

مين .......سلمى...أخيرا...الحمد لله على سلامتك


طب وحياة طنط كيمات على رأى عصمت كاظم فى الفيلم..كنت ابتديت الف على المنتديات أسأل عليكى..المهم إننا اتطمننا عليكى
.........................................


سبايدر..سامح. أهلا بيك معانا تانى ودايما

وفى الحقيقة الفيلم دة كان من إختيارك لما إبتدينا الموضوع زمان وهوا من أفلامى المفضلة بردة .فاحنا اللى بنشكرك

وبمناسبة الرياضة اللى خدتك مننا شوية..فأنا عندى فكرة..نبقى نحط أفلام زى بتاعة شحاتة أبو كف أو افلام صالح سليم فى مواعيد البطولات اللى جاية علشان ماتبعدش عننا ....أنا باضحك معاك طبعا..بس إية رأيك فى الفكرة دى

...............................................................

طبعا الفيلم يعتبر نقلة كبيرة جدا فى افلام العصابات

وكان أداء المجموعة كلها قوى جدا فوق المعتاد...وخصوصا أداء رشدى وصلاح

رشدى أدى ذلك الدور بطريقة جديدة ...طريقة كلامة...لبسة...أو زى مابنقول عامل Style..هدؤة الزايد..ثقة بالنفس...وفوق كل دة احساسة البارد بكل مايعوقة عن هدفة الاجرامى...بالرغم من كل مساؤة الا إنى كنت منجذب لشخصيتة...ولااعلم إذا كنت أنا بس اللى كدة والا فية مشاهدين آخرين بيشاركونى الاحساس دة

أما عن صلاح..فطبعا اللكنة الشامية فى الأفلام المصرية كانت قليلة جدا...وبالرغم من كدة حسيت إن صلاح عمل دورة وقدر يجمع بين إتقان اللهجة والاداء فى حرفية عالية


وطبعا للحديث بقية

[S A L M A]

اهلا بيك معانا من تاني يا سبايدر

ويارب ياخد الكره الي شغلاك عن المنتدى

لألألألألألأ ماتزعلش بهزر بس والله دي الكره حاجه ه اوي

يارب ما تحرمنا من طلتك علينا




وفى الحقيقة فيلم الرجل الثاني فيلم حلو

لكن غريب وجديد علىالسينما

وكمان الفيلم جمع عمالقه ملهم ادوا اوارهم بجديه برعوا بيها

وميرسي اوي يا كوجاك وسلامات

[Kojak]

مواقف من الفيلم

طبعا مانقدرش نسى المبارزة التمثيلية بين صباح (لمياء) وسامية (سمرا) أو زى ماكان بيطلق على الحرب بينهم فى الفيلم.. الشقراء والسمراء.أو الغناء والرقص فى الكازينو بتاع عاصم لتحقيق ربح أكتر.


من المواقف الى عجبتنى فى الفيلم....طبعا مشهد النهاية لما غدر الرجل الأول بالرجل الثانى لما راحلة عند العربية. ونفاجأ بإن عصمت كاظم كان عامل حسابة حتى فى لحظة زى دى بإن لو غدر بية الرجل الأول هايعمل إية

موقف تانى بتاع محمود فرج لما كسر رجل الجرسون ...واللى يكتشف الضابط بعد كدة وإحنا معاة ماذا كان الهدف من كل الحكاية دى

[Kojak]

نبذة عن الفنانة صباح


أحد اشهر الممثلات المطربات فى فترة الخمسينات والستينات, لبنانية ، اكتشفتها الممثله والمنتجه اسيا ، وارادت ان تنافس بها نور الهدى فجاءت بها الى مصر ، قامت بالبطولات المطلقه فى مصر ولبنان ، عملت دويتو مع فريد الاطرش ، عاشت بين وطنها ومصر ، تزوجت من البلدين اكثر من مره منها رشدى اباظه وانور منسى عازف الكمان وهو والد ابنتها هويدا والاذاعى احمد فراج والمطرب فادى ، لكنها قدمت العديد من السهرات الموسيقيه فى لبنان ، تم تكريمها فى مهرجان الاسكندريه 1998 ، اعتزلت السينما 1981 .

من أهم افلامها إزاى أنساك مع فريد الاطرش وشارع الحب مع عبد الحليم والايدى الناعمة مع احمد مظهر وطبعا فيلم اليوم ,الرجل الثانى

نبذة لفنانة سامية جمال,



ولوده فى قريه – يون القس ، مركز بنى سويف ، بدات مع فرقه بديعه مصابنى ، وبعد مرحله الاستعراضات الجماعيه جاءتها فرصه السينما ، لمعت كثنائى غنائى راقص مع فريد الاطرش فى سته افلام ، تزوجت مرتين الاولى من الشاب الامريكى عبد الله كينج ، ثم من رشدى اباظه وانفصلت عنه فى اواخر حياته ، عاشت وحيده بعد ان اعتزلت الاضواء منذ السبعينات ، وعادت للرقص عام 1985 ، ثم عاودت الاعتزال مره اخرى ، اشتهرت فى الافلام التى قامت ببطولتها بتابلوهاتها الاستعراضيه .




ونتقابل فى سهرة الليلة مع فيلم جديد